ಸುರತ್ಕಲ್ ಟೋಲ್ ಮುಚ್ಚುವಿಕೆ ಕಾರಣ? ಎನ್‌ಎಚ್‌ಎಐ ಉತ್ತರಕ್ಕೆ ನಾಗರಿಕರ ಆಕ್ರೋಶ

ಮಂಗಳೂರು, ಸೆಪ್ಟೆಂಬರ್ 11 : ಸುರತ್ಕಲ್–ನಂತೂರು ರಾಷ್ಟ್ರೀಯ ಹೆದ್ದಾರಿ ದುಸ್ಥಿತಿಗೆ ಸುರತ್ಕಲ್ ಟೋಲ್‌ಗೇಟ್ ಮುಚ್ಚುವಿಕೆಯೇ ಕಾರಣವೆಂದು ಎನ್‌ಎಚ್‌ಎಐ ಅಧಿಕಾರಿಗಳು ನೀಡಿದ ಉತ್ತರ ಸಾರ್ವಜನಿಕರಲ್ಲಿ ಭಾರೀ ಆಕ್ರೋಶ ಹುಟ್ಟಿಸಿದೆ. ಹೆದ್ದಾರಿಯ ಗಂಭೀರ ಹಾನಿ ಕುರಿತು ಮಂಗಳೂರಿನ ಯೋಜನಾ ನಿರ್ದೇಶಕರ ಕಚೇರಿಗೆ ಓರ್ವ ಜವಾಬ್ದಾರಿಯುತ ನಾಗರಿಕ ಇಮೇಲ್ ಮೂಲಕ ದೂರು ಸಲ್ಲಿಸಿದ ಹಿನ್ನೆಲೆಯಲ್ಲಿ, ಟೋಲ್ ಸಂಗ್ರಹ ನಿಂತಿರುವುದರಿಂದ ದುರಸ್ತಿಗೆ ಅಗತ್ಯ ನಿಧಿ ಕೊರತೆಯಾಗಿದೆ ಎಂಬ ಉತ್ತರ ಸಿಕ್ಕಿದೆ. ಸಾರ್ವಜನಿಕ ಒತ್ತಾಯದಿಂದ ಟೋಲ್ ನಿಲುಗಡೆ ಮಾಡಿದರೂ, ಈಗ ಶಾಶ್ವತ ದುರಸ್ತಿ ಕಾಮಗಾರಿ ಕೈಗೆತ್ತಿಕೊಳ್ಳಲು ನಿಧಿ ಬಿಡುಗಡೆ ಮಾಡಲಾಗಿದೆ ಮತ್ತು ಮಳೆಯ ನಂತರ ದುರಸ್ತಿ ನಡೆಯಲಿದೆ ಎಂದು ಅಧಿಕಾರಿಗಳು ಸ್ಪಷ್ಟಪಡಿಸಿದ್ದಾರೆ. ಸದ್ಯ ಎನ್‌ಎಮ್‌ಪಿಟಿ, ಕೆಐಒಸಿಎಲ್ ಹಾಗೂ ಕುಲೂರಿನಲ್ಲಿ ದುರಸ್ತಿ ಕಾರ್ಯ ಪ್ರಗತಿಯಲ್ಲಿದೆ. ಆದರೆ ಕೇವಲ ಟೋಲ್ ಮುಚ್ಚುವಿಕೆಯನ್ನೇ ಕಾರಣವನ್ನಾಗಿ ತೋರಿಸಿರುವ ಎನ್‌ಎಚ್‌ಎಐ ಉತ್ತರ ಜನರಲ್ಲಿ ಆಡಳಿತದ ಹೊಣೆಗಾರಿಕೆ ಕುರಿತು ಗಂಭೀರ ಪ್ರಶ್ನೆ ಎಬ್ಬಿಸಿದೆ.